નવી દિલ્હી: દેશમાં વધતા વાયુ પ્રદૂષણ સામે લડવા માટે વૈજ્ઞાનિકોએ મહત્વપૂર્ણ સફળતા મેળવી છે. CSIR-CIMFRના સંશોધકોએ ભારતનું પ્રથમ મોબાઇલ સ્માર્ટ એર ફિલ્ટરિંગ સિસ્ટમ 'સ્માર્ટ એર લિક્વિડ ટ્રી (SALT)' વિકસાવ્યું છે, જેને સામાન્ય ભાષામાં 'પ્રવાહી વૃક્ષ' તરીકે ઓળખવામાં આવે છે.
આ નવીન ટેકનોલોજી કોમ્પેક્ટ હવા શુદ્ધિકરણ પ્રણાલી છે, જે હવામાં રહેલા કાર્બન ડાયોક્સાઇડને શોષી લે છે અને સૂક્ષ્મ શેવાળ (Microalgae)ની મદદથી ઓક્સિજનનું ઉત્પાદન કરે છે. આ રીતે તે કુદરતી વૃક્ષ જેવી કામગીરી કરે છે, પરંતુ ઓછી જગ્યામાં વધુ અસરકારક રીતે હવાની ગુણવત્તામાં સુધારો કરવામાં મદદરૂપ બને છે.
સંશોધકોના જણાવ્યા મુજબ, આ સિસ્ટમનો મુખ્ય હેતુ ગીચ વસ્તીવાળા શહેરો, ઔદ્યોગિક વિસ્તારો અને જ્યાં હરિયાળી માટે પૂરતી જગ્યા ઉપલબ્ધ નથી તેવા વિસ્તારોમાં હવાનું પ્રદૂષણ ઘટાડવાનો છે. તેની મોબાઇલ ડિઝાઇનને કારણે જરૂરિયાત મુજબ તેને એક સ્થળેથી બીજા સ્થળે સરળતાથી ખસેડી શકાય છે.
પર્યાવરણ સંરક્ષણ અને સ્વચ્છ હવા માટે આ શોધને મહત્વપૂર્ણ પગલું માનવામાં આવી રહ્યું છે. ભવિષ્યમાં આ ટેકનોલોજીનો ઉપયોગ સ્માર્ટ સિટી, જાહેર સ્થળો અને ઔદ્યોગિક વિસ્તારોમાં વ્યાપક પ્રમાણમાં થવાની સંભાવના વ્યક્ત કરવામાં આવી છે.