દુબઈ સ્થિત વિશ્વપ્રસિદ્ધ એરલાઈન Emiratesએ ભારતીય મુસાફરો માટે ટિકિટ બુકિંગને વધુ સરળ અને સુલભ બનાવવા નવી EMI (ઈક્વેટેડ મન્થલી ઇન્સ્ટોલમેન્ટ) ચુકવણી સુવિધા શરૂ કરી છે. આ નવી વ્યવસ્થા હેઠળ મુસાફરોને ફ્લાઇટ ટિકિટના સંપૂર્ણ પૈસા એકસાથે ચૂકવવાની જરૂર રહેશે નહીં, પરંતુ તેઓ પોતાની અનુકૂળતા મુજબ માસિક હપ્તામાં ચૂકવણી કરી શકશે. આ સુવિધાનો લાભ Emiratesની સત્તાવાર વેબસાઇટ પરથી ટિકિટ બુક કરાવતા મુસાફરોને મળશે. એરલાઈન દ્વારા આપવામાં આવેલી માહિતી મુજબ મુસાફરો 36 મહિના સુધીના હપ્તામાં ટિકિટની રકમ ચૂકવી શકશે. હપ્તાની અવધિ મુસાફર પોતાની નાણાકીય સગવડ અને ઉપલબ્ધ વિકલ્પો મુજબ પસંદ કરી શકશે. આ નવી ચુકવણી પદ્ધતિથી ખાસ કરીને લાંબા અંતરની આંતરરાષ્ટ્રીય મુસાફરી કરનારા ભારતીય મુસાફરોને મોટો લાભ મળશે. એકસાથે મોટી રકમ ચૂકવવાનો બોજ ઓછો થશે અને વધુ લોકો માટે વિદેશ પ્રવાસનું આયોજન સરળ બનશે. Emiratesનું માનવું છે કે આ પહેલ ભારતીય બજારમાં મુસાફરોને વધુ લવચીક અને અનુકૂળ બુકિંગ અનુભવ આપશે તેમજ એરલાઈનની સેવાઓ વધુ લોકો સુધી પહોંચાડવામાં મદદરૂપ બનશે. ભારતીય ગ્રાહકો માટે રજૂ કરાયેલ આ EMI વિકલ્પને પ્રવાસ ક્ષેત્રમાં મહત્વપૂર્ણ પગલું માનવામાં આવી રહ્યું છે.