કાનપુર: ઉત્તર પ્રદેશના કાનપુરમાં ગ્રાહક હિતને લઈને એક મહત્વપૂર્ણ ચુકાદો સામે આવ્યો છે. એક ગ્રાહકે ₹24માં ખરીદેલા બે બામના ડબ્બામાંથી એક ડબ્બો ખાલી નીકળતાં ગ્રાહક ફોરમમાં ફરિયાદ નોંધાવી હતી.
આ કેસની લગભગ પાંચ વર્ષ સુધી સુનાવણી ચાલી હતી. સુનાવણી દરમિયાન કોર્ટે ખાલી ડબ્બો વેચવો એ ગ્રાહક સાથેની સેવામાં ખામી હોવાનું માન્યું હતું. કોર્ટે ઉત્પાદક કંપની, વિક્રેતા અને ફાર્માસિસ્ટને જવાબદાર ઠેરવ્યા હતા.
ચુકાદા અનુસાર સંબંધિત પક્ષોને ગ્રાહકને ખરીદીના ₹24ની રકમ 7 ટકા વ્યાજ સહિત પરત ચૂકવવાનો આદેશ આપવામાં આવ્યો છે. ઉપરાંત ગ્રાહકને થયેલા માનસિક તણાવ અને હેરાનગતિ બદલ ₹40,000નું વળતર પણ ચૂકવવાનું કોર્ટે નિર્દેશ આપ્યો છે.
આ ચુકાદો ગ્રાહકોના અધિકારોના રક્ષણ માટે મહત્વપૂર્ણ માનવામાં આવી રહ્યો છે અને નાની રકમના મામલામાં પણ ગ્રાહક ન્યાય મેળવી શકે છે તેવો સ્પષ્ટ સંદેશ આપે છે.