શ્રી ગુર્જર ક્ષત્રિય કડિયા યુવા ચેરીટેબલ ટ્રસ્ટ, વરાછા સુરત દ્વારા ૨૩ દિકરીઓના ભવ્ય સમૂહ લગ્નનું આયોજન
સુરત: સમાજસેવા અને માનવતાના ઉત્તમ ઉદાહરણરૂપે, શ્રી ગુર્જર ક્ષત્રિય કડિયા યુવા ચેરીટેબલ ટ્રસ્ટ, વરાછા સુરત દ્વારા આગામી રવિવાર, તા. ૧૪ ડિસેમ્બર ૨૦૨૫ના રોજ ભવ્ય સમૂહ લગ્નોત્સવનું આયોજન કરવામાં આવ્યું છે. આ કાર્યક્રમમાં સમાજની કુલ ૨૩ દિકરીઓના લગ્ન ધામધૂમપૂર્વક સંપન્ન થવાના છે.
સમાજના યુવાનોની આગેવાની હેઠળ દર વર્ષે યોજાતો આ સમૂહ લગ્નોત્સવ સમાજના ગરીબ અને મધ્યમ વર્ગના પરિવારો માટે આશીર્વાદરૂપ સાબિત થાય છે. સામૂહિક લગ્નની પરંપરા માત્ર ખર્ચ બચત નથી, પણ એકતા, સહકાર અને સંસ્કારના મૂલ્યોને જીવંત રાખવાનો પ્રયત્ન છે.
ટ્રસ્ટના આગેવાનો દ્વારા જણાવવામાં આવ્યું છે કે જે ભાઈઓ રોકડ દાન અથવા કરિયાવર (ઘરગથ્થુ સામાન) સ્વરૂપે સહાય કરવા ઈચ્છે છે, તેઓએ શક્ય તેટલી વહેલી તકે પોતાની નોંધ કરાવવી. કારણ કે સમૂહ લગ્ન સમારોહની કંકોત્રીમાં દાતાઓના નામ સમાવવામાં આવશે, અને તેના માટે સમયસર નોંધ અતિ આવશ્યક છે.
આ સમારોહમાં અનેક સમાજપ્રેમી દાતાઓ, આગેવાનો તથા શુભચિંતકોની ઉપસ્થિતિમાં પરંપરાગત વિધિ મુજબ લગ્નવિધિ યોજાશે. કાર્યક્રમનો મુખ્ય હેતુ સમાજની દિકરીઓને સન્માનપૂર્ણ વિદાય આપવાનો છે અને સહકારના આ પ્રયત્નથી સમાજમાં પ્રેમ, એકતા અને સમાનતાનો સંદેશ પ્રસરે છે.
શ્રી ગુર્જર ક્ષત્રિય કડિયા યુવા ચેરીટેબલ ટ્રસ્ટના સભ્યો તથા સમગ્ર કાર્યકર ટીમ સમાજના સહયોગીઓને વિનંતી કરે છે કે તેઓ આ મહાયજ્ઞમાં હિસ્સો બની સમાજસેવા રૂપે પોતાના યોગદાનથી દિકરીઓના ભવ્ય લગ્નોત્સવને સફળ બનાવે.