વડાપ્રધાન શ્રી નરેન્દ્ર મોદીએ સુપરસ્ટાર રજનીકાંતને સિનેમા જગતમાં 50 વર્ષ પૂર્ણ કરવા બદલ અભિનંદન પાઠવ્યા છે. વડાપ્રધાન મોદીએ X પર એક પોસ્ટ કરીને રજનીકાંતની શાનદાર કારકિર્દી અને ફિલ્મો દ્વારા લોકો પર પડેલી ઊંડી છાપને બિરદાવી હતી.
વડાપ્રધાને પોતાની પોસ્ટમાં લખ્યું, "શ્રી રજનીકાંતને સિનેમા જગતમાં 50 વર્ષની ભવ્ય યાત્રા પૂર્ણ કરવા બદલ ખૂબ ખૂબ અભિનંદન. તેમની સફર ખૂબ જ પ્રતિષ્ઠિત રહી છે, અને તેમના વિવિધ પાત્રોએ પેઢીઓથી લોકોના મન પર કાયમી અસર છોડી છે. આવનારા સમયમાં તેમની સતત સફળતા અને સારા સ્વાસ્થ્ય માટે શુભેચ્છાઓ."
વડાપ્રધાને રજનીકાંતને ટેગ કરીને આ શુભેચ્છા પાઠવી હતી. રજનીકાંતે દક્ષિણ ભારતીય સિનેમાથી લઈને સમગ્ર વિશ્વમાં પોતાની એક અલગ ઓળખ બનાવી છે. તેમના ચાહકો તેમને 'થલાઈવા' તરીકે ઓળખે છે. આ 50 વર્ષની સફરમાં તેમણે અનેક યાદગાર ફિલ્મો આપી છે અને લાખો લોકોના હૃદયમાં સ્થાન બનાવ્યું છે.